Shamsud, sem var 42 ára bandarískur ríkisborgari, ók bifreið sinni á hóp fólks sem kominn var saman til að fagna nýja árinu. Að því loknu steig hann út úr bifreiðinni og hóf skothríð. Alls eru fimmtán látnir eftir voðaverkið og 35 slasaðir. Shamsud var skotinn til bana af lögreglu en í bifreið hans fannst meðal annars sprengjuvesti og fáni ISIS-hryðjuverkasamtakanna.
Daily Mail greinir frá því í morgun að hann hafi notað Airbnb-íbúð í St. Roch til að undirbúa árásina. Myndir sem fréttamiðillinn hefur undir höndum sýna til dæmis fulltrúa bandarísku alríkislögreglunnar, FBI, fjarlægja efni til sprengjugerðar úr íbúðinni.
Hverfið sem um ræðir er vinsælt meðal ferðamanna og er þar að finna fjölmargar Airbnb-leiguíbúðir. Saksóknarinn Liz Murrill staðfestir í samtali við NBC News að Shamsud hafi notað íbúðina í þeim tilgangi að undirbúa árásina.
Lögregla vinnur nú að fullu að rannsókn málsins og hefur hún til dæmis til skoðunar myndbönd sem talið er að Shamsud hafi tekið þegar hann ók frá Texas til Louisiana. Bandarískir fjölmiðlar hafa heimildir fyrir því að í þeim tali hann um skilnað við eiginkonu sína og hvernig hann hefði átt sér draum um að ganga í raðir ISIS.
New York Times ræddi í gær við bróður hans, hinn 24 ára gamla Abdur Jabbar, sem búsettur er í Texas. Hann segir að gjörðir bróður hans hafi komið öllum sem hann þekktu í opna skjöldu þvi hann hafi verið „góður náungi, hjartahlýr og góður vinur“.
Ekki löngu eftir árásina í New Orleans sprakk Tesla Cybertruck fyrir utan Trump International-hótelið í Las Vegas og grunar lögreglu að um tilraun til hryðjuverkaárásar hafi verið að ræða. Einn lést í sprengingunni og nokkrir slösuðust.
