Árlegt grindhvaladráp fór fram í Sálabotnum á Austurey í Færeyjum um síðustu helgi. Andstaða heimamanna er að aukast en veiðimenn veiddu tegund sem ekki hefur verið veidd áður.

Breska blaðið Daily mail greinir frá þessu.

„Hver er svangur? Skammist ykkar,“ sagði Tórun Beck, íbúi í Skálabotnum, á samfélagsmiðlum eftir grindhvaladrápið sem fór fram laugardaginn 7. september. Það sem var óvenjulegt var að 156 leiftrar voru drepnir, lítil höfrungstegund sem Færeyingar eru ekki vanir að drepa. „Það átti ekki að reka grindhvali upp á land í síðustu viku af því að það var nóg til. En nú eruð þið að drepa leiftra líka.“

Annar íbúi, Tóta Árnadóttir, tók í sama streng. „Ég held að þeir [hvalirnir] myndu veita meiri gleði ef við sem búum við fjörðinn fengjum að horfa á þá,“ sagði hún.

„Það er ekki hefð hér að drepa leiftra og ég skil ekki af hverju við gerum það núna,“ sagði Irdi Jacobsen.

Gagnrýni á grindhvaladráp Færeyinga hefur aukist ár frá ári. Þykir aðferðin einkar grimmdarleg. Hvalavaðan er rekin upp í fjörur og þar eru hvalirnir skornir, kálfar við hliðina á mæðrum sínum. Færeyingar bera fyrir sig að um sé að ræða hefð og að þetta veiti íbúunum mat. Dýraverndunarsinnar hafa hins vegar bent á að það sé engin þörf á að gera þetta lengur.