Lögreglan á höfuðborgarsvæðinu handtók í gærkvöldi einstakling sem er grunaður um að hafa stungið annan með hnífi í miðborg Reykjavíkur.

Samkvæmt tilkynningu lögreglunnar er málið í rannsókn og ekki hægt að gefa upp frekari upplýsingar að svo stöddu.

Samkvæmt frétt RÚV var fréttastofunni tilkynnt um að tvær konur og karl hefðu verið stungin nærri rafskútufyrirtækinu Hopp við Hörpu. Starfsfólk hafi hlúð að fólkinu þar til viðbragðsaðilar komu. Fjórir sjúkrabílar voru sendir á vettvang.

Þá var önnur hnífaárás í miðborginni í nótt. Einn var vistaður í fangageymslu vegna málsins. Áverkar fórnarlambsins voru minniháttar.

Uppfært:

Lögreglan tilkynnti nú rétt fyrir klukkan 10 að þrír hefðu verið með stunguáverka eftir árásina sem lýst er í fyrri hluta þessarar fréttar. Voru þeir fluttir á bráðamóttöku Landspítala með alvarlega áverka. Voru gerðar aðgerðir á spítalanum í nótt.

„Sá sem grunaður er um verknaðinn var handtekinn og verður yfirheyrður síðar í dag.  Brotaþolar og hinn grunaði eru allt ungt fólk og rannsóknin unnin í samvinnu við barnaverndaryfirvöld,“ segir í tilkynningu lögreglu.

Rannsókn beggja málanna er á frumstigi.