Myndatökubifreiðar frá tæknirisunum Google og Apple hafa sést á götum úti í Reykjavík að undanförnu. Eru þeir að taka myndir fyrir kortagrunna sína, Google Maps og Apple Maps.
Google bílar komu til landsins í júlí árið 2013 og mynduðu víða um land fyrir þrívíddarkerfi Google Maps, það er Google Street View. Voru myndirnar settar inn í kerfið þá um haustið. Sama ár mynduðu bílar á vegum Já.is götur landsins.
Eins og gefur að skilja hefur ýmislegt breyst á rúmum áratug, sérstaklega eftir að ferðamannasprengjan fór af stað. Verður gömlu myndunum skipt út fyrir þær nýju.
Apple bílarnir eru hins vegar á Íslandi í fyrsta skipti. En þeir eru að mynda fyrir þrívíddarþjónustuna Look Around. Er verið að mynda allt landið og gert ráð fyrir að ljúka tökum þann 7. september næstkomandi.
Eins og gefur að skilja hafa náðst ýmis konar furðumyndir í grunninn þegar bílarnir keyra um iðandi mannlífið. Má því segja að nú sé tækifærið fyrir Íslendinga að fá sínar 15 mínútur af frægð.
