„Það er hægt að halda manneskju niðri, en þá smátt og smátt veslast hún upp og hverfur. Það er líka hægt að lyfta manneskju upp og sjá hana blómstra í öryggi og ást.
Öll blóm eru falleg og eiga jafnan tilverurétt hvort sem það er fífill eða hin fegursta rós, njótum fjölbreytileikans í öllum litum regnbogans, höfum blómagarðinn okkar litskrúðugan, maður getur alltaf á sig blómum bætt,“
segir Guðmunda G. Guðmundsdóttir í grein sinni á Vísi sem ber titilinn Daginn eftir og hinir 364.
Greinina skrifar Guðmunda að loknum Hinsegin dögum og segir hún gaman hvað mörg gátu mætt í Gleðigönguna sem farin var síðastliðinn laugardag. Hún segir baráttuna þó halda áfram, við megum aldrei sofna á verðinum né loka augunum fyrir hatursorðræðu og mismunun.
Guðmunda segist ekki búin að ná öllum hinsegin orðunum eða skilja fyrir hvað þau standa, „en þetta síast smátt og smátt inn í minn gamla gráa haus,“ segir Guðmunda.
„Fögnum öllum þessum nýju hinsegin orðum, við verndum ekki Íslenskuna með því að láta hana staðna hún verður að fylgja tísku og straumum annars deyr hún, hrósum frekar þeim sem bjuggu öll þessi flottu orð til á Íslensku, annars væru þau á ensku ekki væri það betra.“
„Veitum okkar nánustu öryggi og skjól til að vera þau sjálf, verum til staðar og elskum þau skilyrðislaust, þetta er nógu erfitt samt, þau verða að geta leitað til og treyst sínum nánustu því heimurinn er enn fullur af bjánum sem halda að þau og þeirra sé merkilegra eða meira en annara, lítilmenni sem finna þörf hjá sér til að níðast á öðrum vegna kynhneigðar, litarhafts, trúar eða þjóðerni án þess að sjá hvað það gerir þá sjálf lítil og ómerkileg.
„Er ekki nóg af hommum á Íslandi,“ sagði maðurinn eins og frægt er orðið og tókst með þessari litlu setningu að ráðast gegn tveimur minnihlutahópum, hælisleitendum og hommum, eftir því sem ég kemst næst er svarið nei, það er alveg pláss fyrir fleiri bæði homma og hælisleitendur, jafnvel samkynhneigða hælisleitendur ef út í það er farið.
Hver manneskja hið fegursta blóm
Í ást og gleði vex og dafnar
Hefjum upp okkar sterkasta róm
Því ástin öllu hatri hafnar“
