Ástand göngupalla við Leirhnjúk og Kröflu er afar bágborið. Út frá myndum að dæma eru þeir algjör slysagildra. Ástandið hefur lítið breyst í langan tíma.
„Þetta var líka svona í fyrra þegar ég var á ferðinni. Mér finnst lítið vera gert í þessu,“ segir Bjarni Meyer Einarsson, ökuleiðsögumaður, en hann var á ferð um svæðið með hóp og tók myndir af ástandi göngupallanna.
„Þetta er algjör slysagildra. Ég veit ekki hvort eða hversu margir hafa slasast en maður þarf virkilega að passa sig þarna,“ segir Bjarni. „Það er kannski betra að sleppa þessu en að hafa þetta svona.“
Hverasvæðið við Leirhnjúk er ein af náttúruperlum Mývatnssveitar. Gríðarlega margir ferðamenn leggja leið sína þangað á hverjum degi.
Frá bílastæði liggur stígur að hnúknum sem tekur um 15 til 20 mínútur að ganga. Liggur leiðin inn í gíga frá Kröflueldum og upp á hnjúkinn sjálfan.
Bjarni vakti athygli á ástandi göngupallanna, sem eru víða brotnir og með stórum götum, á samfélagsmiðlum. Spurði hann hvort það væri til of mikils mælst að fara fram á viðhald á göngustígum sem þessum.
Árið 2016 dæmdi Hæstiréttur Íslands gegn landeigendum í Reykjahlíð sem vildu rukka gjald inn á náttúruperlur við Mývatn. En rukkað hafði verið 800 krónur inn í Leirhnjúk og Námaskarð.
Í viðtali við Fréttablaðið sagði Ólafur H. Jónsson, forsvarsmaður landeigenda, að gjaldtakan væri brýn til að lagað það land sem ferðamenn hefðu eyðilagt.
Árið 2022 var hins vegar tekið upp bílastæðagjald við hveri í Mývatnssveit. Greint var frá því að féð ætti að nýta í uppbyggingu á svæðinu. Sagði Þórólfur Gunnarsson, rekstrarstjóri félagsins Sannra Landvætta sem sá um gjaldtökuna í viðtali við RÚV, að markmiðið væri að skapa öruggari og ánægjulegri upplifun.
Nokkrar umræður hafa skapast um ástand göngupallanna á netinu. Tekið er undir að ástandið sé beinlínis hættulegt.
„Hvað ætli landeigendur séu búnir að fá mikið í kassann af svæðinu við Hveri og hversu mikið ætli þeir séu búnir að eyða í uppbyggingu og verndun lands?“ spyr einn netverji.
„Var þarna í sumar og þetta er hættulegt á köflum. Víða spýtur sem líta ágætlega út en eru alveg að fara gefa sig, bara spurning hvenær,“ segir annar.
Enn annar nefnir að ríkið ætti beinlínis að taka yfir svæði sem þetta.
