Í nótt var reynt að brjótast inn í hraðbankann sem stendur við hliðina á veitingastaðnum Ban Kúnn á Tjarnarvöllum í Hafnarfirði. Í mars var keyrt á hann með lyftara í árangurslausri tilraun til að ná peningum. Hraðbankinn er ónýtur og verður ekki settur aftur upp og verða Vellirnir því hraðbankalausir.
„Það er mánuður síðan hann var settur aftur upp,“ segir Svavar Gunnar Jónsson eigandi Ban Kúnn. Hraðbankinn var ekki á hans vegum heldur Euronet. En að sögn Svavars var gott að hafa hann þarna.
„Þetta er partur af þjónustu. Hraðbankinn var mikið notaður, til dæmis af ferðamönnum. Þessir bankar eru reyndar nokkuð dýrir skilst mér eins og reyndar allir hraðbankar núorðið. Ég veit ekki hvort þetta jók nokkuð viðskiptin hjá mér en þetta er þjónusta,“ segir Svavar.
Nefnir hann að áður en hraðbankinn hafi verið settur upp hafi verið mjög algengt að fólk kæmi og spyrði hvort hægt væri að skipta 1000 eða 5000 króna seðlum í 500, því það var upphæðin sem börnin í hverfinu máttu gefa hvoru öðru í barnaafmælum.
Þann 26. mars síðastliðinn var skotbómulyftara ekið á hraðbankann. Það var einmitt nóttina áður en peningaflutningabíll Öryggismiðstöðvarinnar var rændur í Hamraborg.
Lyftaranum hafði verið stolið frá verktaka í nágrenninu og honum ekið á bankann í tilraun til þess að ná honum út úr veggnum og í burt. Skemmdist bankinn sjálfur en þjófunum tókst ekki að ná peningunum úr honum.
„Það tók þá langan tíma að ná að opna peningahólfið síðast. Þegar búið er að brjóta læsingar og svona þá er þetta erfitt. Peningahólfið er mjög rammgert,“ segir Svavar. En það var starfsfólk Advania sem sá um það.
Eins og áður segir var aftur gerð tilraun til að opna bankann í nótt. Tilkynnt hafði verið um það áður en starfsfólk Ban Kúnn mætti á veitingastaðinn klukkan 10 í morgun. Lögregla kom og rannsakaði málið sem og starfsfólk Advania.
Ekkert var hægt að sjá á myndavélum. „Þeir töluðu um að það hefði verið búið að spreyja á myndavélina í bankanum,“ segir Svavar.
Að hans sögn er nú fullreynt að hafa hraðbanka á þessum stað og verður hann ekki settur aftur upp.
„Það er núna enginn hraðbanki hérna á þessu stóra svæði. Næsti hraðbanki er í miðbæ Hafnarfjarðar,“ segir Svavar.
