Tómas Ingvason, faðir fangans Ingva Hrafns Tómassonar sem tók eigið líf á Litla Hrauni, fær ekki afhent sjálfsvígsbréf sonar síns. Umboðsmaður Alþingis hefur krafið Lögregluna á Suðurlandi um skýringar á þessu.
Mannlíf greinir frá þessu.
Tómas krafðist þess að fá bréfið afhent en Lögreglan á Suðurlandi sendi honum aðeins textabút úr því. Þá sendi Tómas kvörtun til Umboðsmanns sem hefur nú skipað lögreglunni að skýra ákvörðun sína um að neita Tómasi að fá bréfið. Einnig að lögreglan hafi til 12. ágúst í síðasta lagi til að afhenda Tómasi bréfið.
Í viðtali við Mannlíf segist Tómas ekki vita hvað lögreglan sé að fela fyrir honum. Hann fagnar því að Umboðsmaður sé að beita sér í málinu.
Vill allt upp á borð
Ingvi Hrafn, sem var 32 ára gamall, lést í byrjun maí mánaðar. Hann hafði afplánað stóran hluta af fangelsisdómi sínum og var kominn inn á áfangaheimilið Vernd. En var síðan handtekinn af sérsveitinni á Vernd vegna kæru og settur aftur inn á Litla Hraun.
Tómas er búinn að vera mjög áberandi í fjölmiðlum síðan þá og hefur þrýst á fangelsisyfirvöld að skýra allt í sambandi við andlátið. Tómas hefur sagt að mörgum alvarlegum spurningum sé ósvarað varðandi andlátið, meðal annars hvers vegna svo mikilli hörku var beitt við handtökuna á Vernd. Sonur sinn hafi grátbeðið um hjálp en sagt að hann fengi ekki sálgæslu fyrr en eftir helgina sem hann var handtekinn. Það hafi verið of seint því að Ingvi Hrafn tók eigið líf. Ingvi Hrafn glímdi við andlega erfiðleika.
Í viðtali við DV skömmu eftir andlátið sagði Tómas, sem býr í Noregi og hefur misst tvo syni í sjálfsvígum, hafa vitað að þessi handtaka sérsveitarinnar var syni sínum mikið áfall. Hefur Tómas beint spjótum sínum að bæði Fangelsismálayfirvöldum og ríkisstjórn í málinu.
