Nokkrir hundar hafa komið í hitasjokki á Dýraspítalann í Lögmannshlíð á Akureyri undanfarna daga. Einn þeirra var nærri dauða en lífi.
Hundum getur stafað mikil hætta af ofhitnun og mikilvægt er að hundaeigendur séu á varðbergi þegar heitt er í veðri. Einnig að þeir þekki einkennin þegar hundur hitnar mikið.
„Hundar kæla sig eingöngu niður með tungunni/öndun. Þeir eru viðkvæmir fyrir hreyfingu í hita og stórhættulegt að skilja þá (og aðra ferfætlinga) eftir í lokuðum bíl í hlýju veðri,“ segir í færslu Dýraspítalans í Lögmannshlíð. „Rifa á glugga hefur ekkert að segja og stilla miðstöð á kælingu bregst. Hitinn í bílnum stígur hratt og dýrið er algjörlega bjargarlaust.“
Afar heitt hefur verið í veðri fyrir norðan og austan undanfarna daga og varar Dýraspítalinn hundaeigendur við þessu.
„Hundar sem ofhitna og standa á öndinni eftir hreyfingu eða leik í hita verður að kæla niður með vatni sem fyrst,“ segir í færslunni. „Ef um krampa er að ræða verður hundurinn að komast strax til dýralæknis samhliða kælingu (vefja hann t.d. með blautu handklæði). Það hafa komið til okkar nokkrir hundar í hitasjokki nú undanfarna daga og einn nær dauða en lífi.“
