Það eru blikur á lofti í Moskvu. Í rúmlega tvö ár hefur stríðið í Úkraínu virkað sem eldsneyti fyrir rússneska hagkerfið. Þrátt fyrir refsiaðgerðir og umfangsmiklar viðskiptaþvinganir jókst verg landsframleiðsla landsins um 3,6% á síðasta ári.

Nú, þegar tvö ár og fjórir mánuðir, eru liðnir frá upphafi stríðsins er hins vegar hætta á að rússneska stríðsvélin bræði úr sér.

Herman Gref, bankastjóri Sberbank, sem er stærsti banki Rússlands, sagði í síðustu viku að rússneska hagkerfið hafi ofhitnað. Framleiðslugetan sé komin á það stig að útilokað sé að auka hana enn meira og nú færist hún nær því að hrynja.

Ekstra Bladet hefur eftir Flemming Splidsboel, sem er sérfræðingur hjá dönsku hugveitunni DIIS og sérfræðingur í málefnum Rússlands, að vinnuaflið sé einn helsti veikleiki rússneska hagkerfisins. Það sé mikill skortur á vinnuafli og hafi raunar verið áður en Rússar réðust inn í Úkraínu. Staðan hafi ekki batnað í kjölfar innrásarinnar.

Hann benti á að talað sé um að 400.000 til 500.000 rússneskir hermenn hafi annað hvort fallið eða særst í stríðinu. Þess utan séu þeir sem eru í Úkraínu og þeir sem hafa flúið land. Þetta hafi mikil áhrif á vinnumarkaðinn.