Eins og allir vita ganga Íslendingar til forsetakosninga í dag. Forsetaframbjóðendur eru að sjálfsögðu þar á meðal og eiga allir það sameiginlegt að vera einu kjósendurnir sem geta kosið sjálfa sig.

Katrín Jakobsdóttir fyrrverandi forsætisráðherra reið á vaðið í morgun og mætti til að kjósa í Hagaskóla um leið og kjörstaðir opnuðu núna klukkan 9:00. Ljósmyndari DV var á staðnum.

Katrín hefur lengst af í kosningabaráttunni verið efst í skoðanakönnunum eða meðal efstu frambjóðenda og þótt líklegur sigurvegari. Framboð Katrínar hefur reynst umdeilt. Ýmsir hafa sagt það ekki viðeigandi að stíga beint úr stóli forsætisráðherra í forsetaframboð en stuðningsmenn Katrínar hafa komið henni hraustlega til varnar og hafa haldið orðum eins og kvenfyrirlitning á lofti. Talsvert hefur borið á því í umræðunni að þeir kjósendur sem vilji alls ekki að Katrín verði forseti ættu að kjósa þann frambjóðanda sem næstur er henni í nýjustu skoðanakönnunum. Kjósa taktískt hefur það verið kallað.

Fari svo að Katrín beri sigur úr býtum virðist því ljóst að hún ætti mikið verk fyrir höndum við að fylkja þjóðinni að baki sér.

Nokkrar myndir af Katrínu og manni hennar Gunnari Sigvaldasyni á kjörstað í Hagaskóla má sjá hér fyrir neðan: