Staksteinahöfundur Morgunblaðsins segir að sumar af þeim spurningum sem Katrín Jakobsdóttir, forsetaframbjóðandi og fyrrverandi forsætisráðherra, fékk í Forystusætinu á RÚV í vikunni hafi verið furðulegar.

Í þáttunum er rætt við frambjóðendur til embættis forseta Íslands og var Katrín í þætti gærkvöldsins.

Sjá einnig: Jóhanna Vigdís fær á baukinn eftir viðtal við Höllu Hrund: „Furðulegar spurningar satt að segja“

Í staksteinum dagsins í dag kemur fram að margt misskynsamlegt hafi verið rætt um eðli forsetaembættisins á undanförnum vikum.

„Ýmsar hug­mynd­ir um hlut­verk, valdsvið og áhrifa­vald for­seta ekki all­ar í sam­ræmi við raun­veru­leik­ann. For­seti get­ur látið sér annt um til­tek­in mál, en lítið hlutast um þau. Af sama meiði er tafs um „mál­skots­rétt“ for­seta, sem snýst aðeins um synj­un staðfest­ing­ar laga, eða stjórn­ar­mynd­un­ar­um­boð, sem oft er látið með eins og heil­agt gral en hef­ur sára­lítið gildi,“ segir höfundurinn og snýr sér svo að Forystusætinu.

„Von­ir stóðu til að umræðan yrði jarðbundn­ari í For­yst­u­sæt­inu á Rúv. þar sem Sig­ríður Hagalín Björns­dótt­ir las upp spurn­ing­ar fyr­ir Katrínu Jak­obs­dótt­ur. Hún svaraði raun­ar fum­laust og skyn­sam­lega, en sum­ar spurn­ing­arn­ar þeim mun furðulegri.“

„Þannig sagði Sig­ríður að for­seti væri „umboðsmaður al­menn­ings gagn­vart fram­kvæmda­vald­inu“, sem er hug­ar­burður. For­seti þarf að staðfesta lög frá Alþingi, en hef­ur ekk­ert yfir fram­kvæmda­vald­inu að segja annað en að skipa rík­is­stjórn að til­lögu til­von­andi for­sæt­is­ráðherra.“

Þá gagnrýnir staksteinahöfundur að Sigríði hafi verið hugleikið að Katrín gæti orðið vanhæf sem forseti við myndun ríkisstjórna þar sem hún hefði starfað í hinni „vanhelgu“ stjórnmálastétt eins og það er orðað í Morgunblaðinu.

„Ligg­ur þó vel fyr­ir að for­seti er aldrei van­hæf­ur því aðrir fram­kvæma vald hans. Svo hún skáldaði hug­takið „siðferðis­lega van­hæf“ og mælti af drama­tísk­um þunga. Áhorf­end­ur áttu betra skilið.“