Að minnsta kosti fjórir grímuklæddir og þungvopnaðir menn sátu fyrir fangaflutningabíl í Normandí í Frakklandi rétt fyrir hádegi í dag. Tókst þeim að stöðva bílinn með því að keyra öðrum bíl á flutningabílinn og hófu þeir síðan skothríð úr Kalashnikov-riflum á fangaverðina í bílnum. Þrír þeirra létust í árásinni og að minnsta kosti þrír særðust. Á vef Daily Mail má finna myndband af árásinni.
Tókst byssumönnunum að því er virðist ætlunarverk sitt sem var að frelsa hinn 30 ára gamla Mohammed Amra, sem er alræmdur fíkniefnabarón ytra sem ber viðurnefnið „Flugan“. Flúðu byssumennirnir og Amra af vettvangi í kjölfarið í tveimur bílum en annar þeirra fannst í ljósum logum skömmu síðar.
Árásin átti sér stað við tollahlið nærri bænum Val-de-Reuil í Normandí en verið var að flytja „Fluguna“ milli fangelsa í bæjunum Rouen og Evreux.
Amra var að afplána 18 mánaða dóm fyrir ýmis rán en hann hefur einnig afplánað dóm vegna tilraunar til manndráps. Þá hefur hann einnig verið ákærður fyrir aðkomu sína að morði í Marseille í júní 2022 og átti því mögulega yfir höfði sér þungan dóm.
Hann er talinn vera höfuðpaur fíkniefnahrings og afar hættulegur. Um helgina gerði hann aðra tilraun til að flýja en sú tilraun heppnaðist ekki.
Emmanuel Macron, Frakklandsforseti, birti fyrir stundu stutta yfirlýsingu á samfélagsmiðlinum X þar sem hann sagði að árásin væri áfall fyrir alla Frakka. Þjóðin myndi standa þétt við bakið á fjölskyldum hinna látnu, hinum særðu og kollegum þeirra.
„Verið er að gera allt til þess að finna þá sem bera ábyrgð á þessum glæp svo hægt sé að kalla yfir þá réttlæti í nafni allra Frakka,“ sagði Macron.
L’attaque de ce matin, qui a coûté la vie à des agents de l’administration pénitentiaire, est un choc pour nous tous.
La Nation se tient aux côtés des familles, des blessés et de leurs collègues.
Tout est mis en œuvre pour retrouver les auteurs de ce crime…
— Emmanuel Macron (@EmmanuelMacron) May 14, 2024
