Snorri Ásmundsson, myndlistarmaður og fyrrverandi forsetaframbjóðandi, skrifar skemmtilegan pistil í Morgunblaðið í dag þar sem hann útskýrir hvers vegna hann ákvað að bjóða sig ekki fram til forseta.

„Ég skil ekki þessa þjóð, þess vegna væri ég ekki gott sam­ein­ing­ar­tákn og það var rétt og heiðarlegt af mér að gefa ekki kost á mér í for­seta­embættið í ár. Mér finnst líka gam­an að vera ekki for­seti og þetta embætti er líka hlægi­legt fyr­ir stór­brot­inn mann eins og mig,“ segir hann í pistlinum og heldur áfram:

„Ég er prins og flest­um prins­um fynd­ist kjána­legt að taka þátt í svona at­vinnu­viðtöl­um í feg­urðarsam­keppn­is­stíl. Mér finnst for­setafram­bjóðend­urn­ir í ár marg­ir hverj­ir góðir kandí­dat­ar í því sem þeir eru að gera í líf­inu og vil eng­um það að þurfa að vera í starfi for­seta.“

Snorri segir að Vigdís Finnbogadóttir hafi eitt sinn hvíslað því að honum þegar hann var í framboði fyrir 20 árum að það væri ekkert sérstaklega skemmtilegt starf að vera forseti.

„En ég sé þó nokkra af þeim sem eru í fram­boði nú al­veg fyr­ir mér sem glæsi­lega for­seta. Mér fannst skemmti­legra að vera fjall­kona en for­setafram­bjóðandi og þótt ég yrði frá­bær for­seti er ég betri pí­anó­leik­ari og miklu betri kokk­ur,“ segir hann og endar grein sína á að óska þeim frambjóðendum velfarnaðar sem eru í framboði til forseta Íslands að þessu sinni.

Snorri var í viðtali í Lestinni á Rás 1 á dögunum og þar sagði Snorri að hann hefði fengið margar áskoranir um að bjóða sig fram.

„Margir eru í fýlu yfir að ég sé ekki að fara fram. En svo er nokkuð sem fólk gleymir, eða kemur á óvart, og það er að það eru tuttugu ár síðan ég var framboði,“ sagði Snorri sem var opinber forsetaframbjóðandi fyrir kosningarnar 2004. Hann dró framboð sitt til baka áður en kom að því að skila inn meðmælalista. Þó hann hafi ekki farið aftur í forsetaframboð hefur hann í tvígang boðið sig fram til formanns Sjálfstæðisflokksins en ekki haft erindi sem erfiði.