Lögmaðurinn Ómar R. Valdimarsson og stofa hans, Esja legal ehf. þurfa að greiða konu tæpar 500 þúsund krónur eftir að hann áskildi sér hærra endurgjald fyrir þjónustu sína, en hæfilegt þótti. Þetta kemur fram í dómi Héraðsdóms Reykjavíkur frá 14. mars sl.
Um er að ræða unga konu sem lenti í umferðarslysi árið 2020. Hún leitaði í kjölfarið til Ómars hjá Esja Legal og veitti honum umboð til að innheimta fyrir sig bætur til tryggingafélags. Tæpum tveimur árum síðar, 2022, skrifaði Ómar undir fullnaðaruppgjör við Vátryggingafélag Íslands. Heildarbætur námu um 4,4 milljónum og þar af voru 356 þúsund krónur að viðbættum virðisaukaskatti vegna lögmannskostnaðar.
Ómar greiddi konunni svo bæturnar en dró frá rétt rúma 1,1 milljón sem hann reiknaði sér í þóknun. Konan fékk því um 3,3 milljónir í sinn hlut. Árið 2023 las konan í fréttum að úrskurðarnefnd lögmanna hafi gert Ómari að greiða hluta endurgjalds til skjólstæðings þar sem Ómar hefði reiknað sér meira en 75 prósent álag á þóknun tryggingarfélags.
Konan sá að það sama ætti við um hennar mál og fékk lögmann til að senda Ómari innheimtuviðvörun. Þar krafðist konan þess að fá endurgreidda þóknun sem Ómar hafði reiknað sér umfram 75 prósent álag á lögmannskostnaðinn sem Vátryggingafélag Íslands greiddi. Um var að ræða 490 þúsund krónur.
Svaraði Ómar innheimtutilraunum konunnar með því að krefja nýjan lögmann hennar um umboð. Slíku umboði var þó ekki framvísað fyrr en málið var rekið fyrir dómstólum. Kröfðust Ómar og Esja legal þess því fyrir dómi að vera sýknuð af kröfu um dráttarbætur, enda yrði þeim ekki kennt um drátt. Þau hafi ekki deilt um höfuðstól kröfunnar, en hvorki fengið sönnun á umboði frá lögmanni konunnar né upplýsingar um reikningsnúmer. Þar með væri ekki um greiðsludrátt að ræða heldur viðtökudrátt. Eins sé ekki hægt að krefjast dráttarvaxta frá því að bætur voru greiddar til konunnar þar sem hún hafi ekki mótmælt áskildu endurgjaldi Ómars fyrr en rúmu ári síðar.
Eins hafnaði Ómar því að þurfa að greiða málskostnað í málinu þar sem málið væri höfðað af þarflausu og án tilefnis, enda hafi hann fallist á að greiða höfuðstól kröfunnar „en vegna þrákelkni lögmanns hennar hafi þeim reynst það ómögulegt,“ segir í dómi.
Dómari í málinu rakti að óumdeilt væri að Ómari og Esju legal bæri að gera upp höfuðstól kröfunnar, 490 þúsund krónur. Hins vegar sé ekki hægt að krefjast dráttarvaxta fyrr en eftir að skorað hafi verið á Ómar að greiða kröfuna. Þar með bæri að greiða dráttarvexti frá júlí 2023.
Eins taldi dómari að ekki yrði séð af samskiptum Ómars og lögmanns konunnar, að Ómar hafi óskað eftir reikningsnúmeri. Eins hafi Ómar greitt bæturnar á sínum tíma inn á reikning konunnar og hljóti því að hafa haft þessar upplýsingar sjálfur. Það væri þó rétt að lögmaður konunnar hafi ekki brugðist við áskorunum um að afhenda umboð sitt, en það jafngildi ekki viðtökudrætti.
Því þurfa Ómar og Esja legal að greiða 490 þúsund krónur auk dráttarvaxta frá og með 20. júlí 2023 til greiðsludags. Málskostnaður fellur þó niður þar sem dómari taldi að máli þessu hefði mátt ljúka með einföldum hætti, án málsóknar.
