Stefán Ingimar Koeppen Brynjarsson, sem alþjóðalögreglan Interpol hefur lýst eftir, að beiðni íslensku lögreglunnar, neitar að koma til landsins. Vísir greindi frá þessu í dag.
Lögreglan vill yfirheyra Stefán vegna gruns um aðild að þremur stórum fíkniefnabrotum. Hann er meðal annars grunaður um að hafa staðið að baki innflutningi á fíkniefnum hingað til lands með burðardýrum. Einnig er hann talinn tengjast máli sem varðar innflutning á amfetamíni með Norrænu í apríl í fyrra. Um var að ræða mjög stórt smygl og lagði lögregla halda á nokkra tugi kílóa af amfetamíni.
Íslenska lögreglan hefur verið í sambandi við Stefán en hann hefur neitað að koma til landsins í yfirheyrslu.
„Við vonumst til þess að maðurinn sjái að sér og standi fyrir máli sínu,“ segir Grímur Grímsson, yfirlögregluþjónn á miðlægri rannsóknardeild lögreglunnar á höfuðborgarsvæðinu, í samtali við mbl.is um málið.
Árið 2019 birti DV yfirlit yfir Íslendinga sem sátu þá í fangelsum erlendis. Var Stefán einn þeirra. Stefán var handtekinn í Cancún í Mexíkó í október 2016, grunaður um fíkniefnasmygl. Fjallað var um handtöku hans í þarlendum fjölmiðlum en þar kom ekki fram hvers konar fíkniefni var um að ræða eða hversu mikið magn. Eftir handtökuna var Stefán fluttur í Cefereso-fangelsið í Perote.
Stefán var fyrir tveimur áratugum dæmdur í átta ára fangelsi fyrir að hafa staðið að stórfelldum innflutningi fíkniefna til landsins, árin 1998 og 2001 (sjá frétt RÚV). Um var að ræða smygl á kókaíni og amfetamíni. Fram kom í dómi Hæstaréttar að Stefán Ingimar hefði komist í kast við lögin í Þýskalandi og Hollandi.
