Kristín segir að staðan á gosstöðvunum sé svipuð og í gærkvöldi þó aðeins hefði dregið úr kraftinum – virknin sé nú að mestu bundin við eitt svæði.
„Þetta eru nokkrir gígar sem eru að myndast, þetta er svona sunnan til á þessari gosrás sem opnaðist þarna á laugardagskvöldið. Hraun er þá að renna aðallega í suðurátt en mjög hægt. Það eru ennþá einhverjir hundruð metrar í að hraunið nái Suðurstrandarvegi,“ sagði Kristín.
Hún segir að gosið nú sé frábrugðið fyrri gosum að því leyti að hraun rennur bæði til suðurs og vesturs. Gosið nú sé örlítið sunnar en síðasta gos og það hafi mikil áhrif. Ljóst sé þó að varnargarðar hafi skipt sköpum við að beina gosinu frá mikilvægum innviðum.
Töluverð mengun er á svæðinu og segir Kristín að úr því sem komið er ætti hún ekki að hafa mikil áhrif á íbúa í næsta nágrenni gosstöðvanna. Þó væri mikilvægt fyrir viðbragðsaðila á svæðinu að fylgjast með mengun.
Enn er hætta á að hrauntjarnir sem hafa myndast muni bresta, að sögn Kristínar. „Þetta er eitthvað sem gerist þegar landslagið er tiltölulega flatt. Það geta hlaðist upp hraunstíflur sem geta brostið og það er ennþá möguleiki. Þetta er að gerast á ýmsum stöðum, ofarlega og áður en hraunið rennur ákveðið til suðurs en líka við varnargarðinn austan við Grindavík. Þar vitum við að hraun hefur safnast saman í polla sem gætu brostið. Þetta er mjög staðbundin hætta, fyrst og fremst fyrir viðbragðsaðila.“
Aðspurð hvort hægt sé að spá fyrir um goslok segir Kristín að það kæmi ekki á óvart þó þetta myndi klárast á næstu 1-2 sólarhringum. „Ég held að þetta sé dagaspursmál,“ segir hún.
Kristín sagðist hafa rætt við Bjarka Kaldalóns Friis, náttúruvársérfræðing á Veðurstofunni, í morgun um stöðuna á svæðinu, sem sagði að vísbendingar væru um að kvikusöfnun sé hafin að nýju. Sagði Kristín að lokum að staðan hvað það varðar muni skýrast betur á næstu dögum.
