Ólafur Jóhann Ólafsson rithöfundur hefur staðfest að hann muni ekki bjóða sig fram til embættis forseta Íslands. Þetta kemur fram í tilkynningu frá bókaútgáfunni Bjarti & Veröld sem gefur bækur Ólafs Jóhanns út. Ólafur Jóhann segir í tilkynningunni:
„Að gefnu tilefni tilkynni ég að ég hyggst ekki gefa kost á mér í kjöri til forseta Íslands.
Ég vil færa þeim fjölmörgu sem hafa hvatt mig til að bjóða mig fram innilegar þakkir en með því hafa þau sýnt mér ómetanlegt traust.
Ég treysti þjóðinni til að finna í þetta vandmeðfarna embætti einstakling sem er því vaxinn – gætir hagsmuna Íslands heima og heiman, stendur vörð um menningu okkar og tungu, þekkir sögu okkar og sérstöðu en sér um leið fram á veginn.“
