Á föstudaginn sagði yfirmaður úkraínska flughersins að tekist hefði að skjóta rússneska Beriev A-50 flugvél niður yfir Asovhafi. Í kjölfarið birtust myndbönd á samfélagsmiðlum sem sýna að sögn vélina hrapa eins og logandi eldhnött.

A-50 vélarnar eru fullkomnar ratsjárflugvélar sem eru notaðar til að vakta loftrýmið. Þær geta fylgst með umferð flugvéla, skipa og flugskeyta í mörg hundruð kílómetra radíus.

Áður en Rússar réðust inn í Úkraínu áttu þeir níu vélar af þessari tegund. Nú eiga þeir aðeins sjö því í janúar skutu Úkraínumenn aðra slíka vél niður.

Hans Peter Michaelsen, varnarmálasérfræðingur og fyrrum yfirmaður í danska flughernum, sagði í samtali við TV2 að vélar þessarar tegundar séu mjög mikilvægar fyrir Rússa og þeir eigi ekki margar eftir. Það hafi verið þungt högg fyrir þá þegar vélin var skotin niður í janúar og höggið nú sé enn þyngra.

Hver vél af þessari tegund kostar sem nemur um 40 milljörðum íslenskra króna.

Úkraínumenn segja að vélin, sem var skotin niður á föstudaginn, hafi verið ný og betrumbætt útgáfa af þessum vélum.

„Eitt er að missa vélina en áhafnirnar, sem maður missir einnig, eru sérmenntaðar og mjög reyndar,“ sagði Michaelsen.

Hann sagði A-50 vélarnar vera eins og „hljómsveitarstjórann í sinfóníuhljómsveit“. Þetta séu flugvélar sem hafi mikla yfirsýn og leiðbeini öðrum flugvélum rússneska flughersins.

Vandi Rússa er að þeir geta ekki útvegað sér nýjar flugvélar af þessari tegund.  Það tekur tvö til þrjú ár að smíða eina slíka og því hrista Rússar þær ekki beinlínis fram úr erminni.