Athafnamaðurinn Karl J. Steingrímsson, gjarnan kenndur við Pelsinn, er látinn 76 ára að aldri. Samkvæmt mbl.is lést Karl á Landspítalanum í Fossvogi á fimmtudaginn.
Karl rak, ásamt eiginkonu sinni, verslunina Pelsinn í miðborginni í rúmlega 40 ár. Hann var umsvifamikill í fasteignaviðskiptum um nokkurra áratuga skeið og virkur í félagsstörfum. Sem unglingur spilaði hann knattspyrnu með KR og lék með fyrsta unglingalandsliði Íslands árið 1965. Seinna varð hann formaður Knattspyrnudeildar Breiðabliks. Hann var gjaldkeri í stjórn vináttufélags Ítalíu og formaður húsnefndar JCI-hreyfingarinnar á Íslandi.
Eftirlifandi eiginkona Karls er Ester Ólafsdóttir. Hann lætur eftir sig sex börn og sextán barnabörn.
Útför Karls fer fram frá Hallgrímskirkju þriðjudaginn 19. mars klukkan 13:00.
