Eins og fram hefur komið í fjölmiðlum keyrði maður á hóp fólks sem var á jólamarkaði í borginni Magdeburg í Þýskalandi, fyrr í kvöld.
Fram hefur komið að minnsta kosti tveir eru látnir og um 60-80 manns eru slasaðir, sumir alvarlega. Ljóst er að um árás var að ræða en á myndskeiði sem er í dreifingu á samfélagsmiðlum má sjá bílnum ekið á miklum hraða í gegnum markaðinn en stutt var á milli sölubása á þeirri leið sem ekin var. Fjöldi fólks var staddur á leiðinni sem árásarmaðurinn ók og ljóst er að honum tókst að aka að minnsta kosti á nokkra tugi manna.
Fréttir eru á kreiki á samfélagsmiðlum og í fjölmiðlum um að dánartalan eigi eftir hækka en í fréttum Spiegel kemur fram að yfirvöld hafi staðfest að tveir séu látnir, 1 fullorðinn og 1 lítið barn og fjöldi slasaðra sé fleiri en 50. Bild Zeitung segist hins vegar hafa heimildir fyrir því að 11 manns séu látnir.
Borgaraþjónusta utanríkisráðuneytisins hvetur Íslendinga í Magdeburg til að láta vita af sér á samfélagsmiðlum eða með því að hafa samband við aðstandendur. Þurfi þeir aðstoð er hægt að hringja í síma +354 545-0-112. Beinir borgaraþjónustan því til þessa hóps að fara að fyrirmælum yfirvalda og fylgjast með þýskum fjölmiðlum.
Hinn grunaði árásarmaður var handtekinn skömmu eftir árásina en hann er sagður hafa ekið svörtum BMW. Spiegel hefur heimildir fyrir því að hann sé frá Saudi-Arabíu.
Á samfélagsmiðlum hefur borið á umræðu meðal Þjóðverja um að landið eigi í menningarstríði og að innflytjendastefna stjórnvalda hafi misheppnast gjörsamlega. Af mörgum færslum virðist sem að viðkomandi hafi hreinlega gert ráð fyrir því frá upphafi að um væri að ræða múslima af arabískum uppruna.
Skemmst er að minnast sambærilegrar árásar á jólamarkað í Berlín árið 2016 þar sem samtals 13 létust. Tveimur árum seinna létust 5 í árás á jólamarkað í Strasbourg í Frakklandi. Yfirvöld hafa varað við því að íslamskir hryðjuverkamenn hafi jólamarkaði sem skotmark en fyrr í mánuðinum tókst að koma í veg fyrir fyrirhugaða árás á jólamarkað í borginni Augsburg í Þýskalandi en íraskur hælisleitandi var handtekinn vegna gruns um áformin.
