Reynir Traustason, ritstjóri Mannlífs, ætlar að hætta í blaðamennsku við yfirvofandi kaup Heimildarinnar á Mannlífi. Hann segir verðmiðann á miðlinum ekki háan.

„Á næstu vikum stefni ég að því að hætta störfum sem ritstjóri Mannlífs eftir tæplega fimm ára starf í þessari lotu. Það er mér mikil ánægja að Mannlíf, Vín og matur og mannlif.is fara að líkindum undir útgáfu Heimildarinnar,“ segir Reynir í færslu á samfélagsmiðlum.

Greint var frá yfirvofandi kaupum Sameinaða útgáfufélagsins, sem rekur Heimildina, á Sóltúni ehf, sem rekur Mannlíf, í kvöld. Ekki var einhugur um kaupin í stjórn Sameinaða útgáfufélagsins og sögðu tveir stjórnarmenn, sem áður höfðu verið eigendur í Kjarnanum, sig úr stjórn vegna kaupanna.

„Rétt er að halda því til haga að yfirtakan á fjölmiðlinum hefur ekki í för með sér breytingar á eignarhaldi á Heimildinni. Og til þess að eyða misskilningi þá er verðmiðinn á fjölmiðlinum ekki hár,“ segir Reynir.

Viðræður um söluna á miðlum Mannlífs hafi staðið síðan í júní og miði vel. „Við, eigendur Mannlífs, sem báðir erum í hópi stofnenda Stundarinnar höfðum fyrst og fremst að leiðarljósi að tryggja starfsfólki okkar áframhaldandi störf í góðu umhverfi,“ segir Reynir.

Það sem tekur við hjá Reyni eru verkefni hjá Ferðafélagi Íslands, bókaskrifum og að stýra hlaðvarpinu Sjóaranum. Ætlar hann að stíga út úr daglegu þrasi fréttamiðla.

„Ég verð áfram hluthafi í Heimildinni og mun rækja þær skyldur sem því fylgja,“ segir Reynir að lokum. „Næstu vikur fara í að ljúka samningum. Spennandi ár er í uppsiglingu. Ég er þakklátur fyrir skemmtilega tíma og rúmlega 30 ára starf við blaðamennsku. Þetta er orðið gott í bili og tímabært að huga að áhyggjulausu ævikvöldi.“