Lenya Rún Taha Karim, fyrrverandi þingmaður Pírata og frambjóðandi flokksins í nýafstöðnum kosningum, lýsir yfir miklum vonbrigðum með kosningaúrslitin. Hún er óviss um framtíðina og veit ekki hvort hún ætlar að verða áfram virk í starfi flokksins, en Píratar náðu ekki manni á þing og hlutu aðeins 3,0% atkvæða.
„Ég er bara enn að ákveða mig, ætla bara að taka daginn í dag og næstu viku til að melta,“ segir Lenya í stuttu spjalli við DV. Aðspurð hvort hún færi mögulega í annan flokk, segir hún:
„Nei, ég held ekki, en ég er ekki í ástandi til að útiloka neitt núna. En ég á alltaf samleið með grunngildum Pírata.“
Í Facebook-færslu segist Lenya hugleiða að snúa sér að lögfræðistörfum og jafnvel doktorsnámi:
„Ég ætla að vera hreinskilin: Þetta eru mikil vonbrigði. Ég get talið upp alls konar atriði um íslenska kosningakerfið sem er ólýðræðislegt en ég nenni því ekki, og er of þreytt til þess. Það sem ég vil hins vegar segja er að Píratar þurfa klárlega að fara í innri endurskoðun og ákveða sína vegferð vandlega næstu 4 árin. Grunngildi Pírata og aðhaldið sem við veitum hefur sjaldan verið jafn aðkallandi, og munu næstu ár fara í uppbyggingu flokksins – hvernig sú uppbygging fer fram verður þó að koma í ljós.
Mig langar að þakka öllum sem treystu Pírötum fyrir atkvæðinu sínu og fyrir stuðninginn síðustu vikur. Ég er ekki búin að ákveða hvort ég ætli að taka þátt í þessari uppbyggingu sem þarf að eiga sér stað í Pírötum vilji hann eiga möguleika á að ná brautargengi í næstu kosningum, eða hvort ég láti verða af þeirri furðulegu þörf á að fara í doktorsnám fyrir þrítugt, eða hvort ég snúi aftur til starfa sem lögfræðingur. Mig langar að gera svo margt sjáið til, og ég er ennþá svo ung.“
