„Það vakti athygli í Suðurkjördæmi þegar auglýsingar með myndum af frambjóðendum Miðflokksins voru skemmdar með eggjakasti. Þetta er alvarlegur atburður sem vekur spurningar um það hversu langt sumir eru tilbúnir að ganga til að bæla niður málefnalega umræðu,” segir í færslu Kristófers.
Víkurfréttir greindu frá málinu í gær en um er að ræða myndir sem prýða Hafnargötu 60 í Keflavík. Höfðu Víkurfréttir eftir Karli Gauta Hjaltasyni, fyrsta manni á lista Miðflokksins í Suðurkjördæmi, að hann kysi nú frekar að geta átt málefnalegar umræður en þetta.
„Þetta athæfi er ekkert annað en ofbeldi – tjón á eignum og andlegt álag fyrir þá sem verða fyrir slíkum árásum. Miðflokkurinn hefur verið óhræddur við að taka á erfiðum málefnum, ekki síst í tengslum við útlendingamál, og leggur áherslu á opna og málefnalega umræðu. En þessi árás sýnir það svart á hvítu að ekki allir virða lýðræðislegar leikreglur,“ segir Kristófer í færslunni sem birtist í morgun.
„Hvers vegna eru ákveðnir hópar svona óttaslegnir við umræður um stefnu í útlendingamálum? Þegar rökin duga ekki er stundum gripið til slíkra aðgerða. Slíkt er ekki bara sorglegt, heldur einnig hættulegt fyrir lýðræðislega umræðu,“ bætir hann við.
Hann segir að Gullbrá fordæmi þessi skemmdarverk harðlega.
„Lýðræðislegt samfélag grundvallast á virðingu og frelsi til að tjá skoðanir, hvort sem fólki líkar þær skoðanir eða ekki. Við skorum á alla að standa saman gegn slíku ofbeldi og halda áfram að ræða málin af yfirvegun og virðingu. Samfélag okkar á betra skilið en að sjá þetta. Lýðræðið verður að sigra, ekki ofbeldið. Miðflokkurinn mun ekki láta slíkt atferli stöðva sig í að tala fyrir stefnumálum sínum og halda áfram að vera málefnalegur kostur í íslenskum stjórnmálum,” segir Kristófer að lokum.
