Vísir greindi frá því í gærmorgun að Dagur hefði hvatt alla kjósendur Sjálfstæðisflokksins til að strika nafn sitt út á kjörseðlinum. Hann gat þess hins vegar ekki að með því að gera slíkt ógildist atkvæði viðkomandi því aðeins er hægt að breyta þeim lista sem maður kýs.
Morgunblaðið segir frá því í dag að samkvæmt 136. grein kosningalaga séu villandi kosningaupplýsingar sakamál og varða sektum, liggi ekki þyngri refsing við samkvæmt öðrum lögum. Þá sé það brot á 103. grein hegningarlaga verði maður valdur að því með sviksamlegum hætti að atkvæði annars manns ónýtist.
Eins og fram kom í frétt Vísis í gær lét Dagur umrædd ummæli falla á Facebook-síðu Baldvins Jónssonar, tengdaföður Bjarna Benediktssonar forsætisráðherra og formanns Sjálfstæðisflokksins. Sagði Baldvin að nú mætti auka inntöku D-vítamíns í eina viku, taka eina töflu fyrir svefninn og eina áður en maður vaknar.
Dagur skrifaði athugasemd við færsluna en hvatti Baldvin til að vara sig á of miklu D-vítamíni. Magnús Rúnar Kjartansson spurði í athugasemd við færslu Dags:
„Ætlar þú virkilega að bjóða þig fram sem mikinn reynslubolta í pólitík?? Kanntu ekki að SKAMMAST ÞÍN.“
Svaraði Dagur Magnúsi fullum hálsi og sagði: „Já, hvet alla kjósendur Sjálfstæðisflokksins til að strika yfir mig.“
Dagur hefur sjálfur sagt að þetta hafi verið tilraun til fyndni en lögmenn sem Morgunblaðið ræddi við segja að engu að síður kynni hann að sæta sekt verði málið kært. Um væri að ræða alvörumál um framkvæmd kosninga og Dagur ætti að vita betur með alla sína reynslu.
