Atli Steinn Guðmundsson, blaðamaður Morgunblaðsins, er afar pennafær en fréttir hans vekja jafnan eftirtekt fyrir notkun ýmissa eldri orða sem eru ekkert endilega algeng í fjölmiðlum nú til dags.

Lesenda Morgunblaðsins þótti greinilega nóg um en sá sendi athugasemd til ritstjórnar blaðsins og taldi líkur á að gervigreindarforrit væri að dæla textanum út en ekki blaðamaðurinn sjálfur í grein sem fjallaði um fyrrum forstjóra Volvo sem féll frá á dögunum.

„Mig langaði að vita hvort frettir sem eru birtar af Atla Steini Guðmundssyni séu skrifaðar með tækni gervigreindar, en þær innihalda jafnan mjög furðulegt orðalag sem fæstum dytti í hug að nota,“ skrifaði hinn áhyggjufulli lesandi og vísaði í áðurnefnda frétt.

„Hver er stefna ykkar í slíkum málum, þ.e. að gervigreind skrifi fréttir fyrir fréttamenn ykkar? Þarf ekki að tilgreina slíkt?“ spyr hinn áhyggjufulli lesandi.

Atli Steinn, sem búsettur er í Noregi og hefur skrifað þaðan um árabil, hefur greinilega afar gaman að þessum ásökunum og greindi frá þeim í færslu á Facebook-síðu sinni.

„Ýmislegt er manni brigslað um í blaðamennskunni og ekki allt gáfulegt, enda kannski ekki við að búast þegar maður tilheyrir þrettándu hötuðustu stétt landsins samkvæmt nýlegri könnun (væri raunar alveg til í að vera ofar á þeim vafasama lista). Það nýjasta er að ég skrifa að mati þessa ritara með hjálp gervigreindar, „furðulegt orðalag sem fæstum dytti í hug að nota“,“ skrifar Atli Steinn og bætir við:

„Ætli viðkomandi hafi kannað sérstaklega hvaða orðalag fæstum eða flestum dytti í hug að nota? Lífið er skemmtilegt. P.s. Viðkomandi hlíft við nafnbirtingu, annað væri ekki gustuk eins og amma sáluga sagði gjarnan. Líklega annað dæmi um orðalag sem fæstum dytti í hug að nota. Þar höfum við það, ég er tölvuforrit. „The Matrix has you.“,“ skrifar Atli Steinn.