„Ef Sjálfstæðisflokkurinn ætlar að halda haus og ekki skíta uppá bak í komandi kosningum þá þarf flokkurinn að leyfa hvalveiðar,” segir Kristján í pistli á Facebook-síðu sinni.
„Ég tala við mikið af fólki og flokkurinn hefur dalað mikið í fylgi. Þetta er alls ekki sami flokkurinn og hann var. Flokkurinn þarf að þora að standa í lappirnar og taka erfiðar ákvarðanir, óvinsælar ákvarðanir,“ segir hann en eins og Kristján bendir á hefur Sjálfstæðisflokkurinn átt í vök að verjast í skoðanakönnunum og margt sem bendir til þess að hann fái sögulega lélegt fylgi í komandi kosningum.
Kristján er þeirrar skoðunar að þessar óvinsælu ákvarðanir styrki flokkinn fyrir grjótharða stuðningsmenn hans. „Og það er það sem skiptir öllu máli, án fylgismanna þá verður enginn flokkur. Sama er með verslanir, án viðskiptavina, þá er engin rekstur.“
Kristján bendir á að Ísland sé lítið land og allir séu vinir einhvers – hvert sem litið er sé spilling eða vinargreiði í einhverju formi. Sjálfur hafi hann það móttó í lífinu að versla við þau fyrirtæki eða aðila sem versla við hann og hans fyrirtæki. „Kallast það spilling eða vinargreiði?“
Kristján segir einnig mikilvægt að átta sig á því að við kjósum fólk sem við þekkjum og treystum fyrir því sem það segist standa fyrir og stendur við orð sín.
„Ef flokkurinn leyfir ekki þessar hvalveiðar og það fyrir kosningar þá verður fyrst fylgishrun. Ég persónulega er hvorki með eða á móti hvalveiðum, en hef heyrt frá sjómönnum landsins að það er hvalur ALLS STAÐAR og hann étur mikinn fisk frá okkur,“ segir Kristján sem segir að það ætti ekki að saka að „veiða nokkra hvali“ eins og hann orðar það. Hann segist munu fylgjast vel með atburðarásinni næstu daga og segir tvo möguleika vera í stöðunni fyrir Sjálfstæðisflokkinn. „Tapa með reisn eða sigra fyrir sína fylgjendur.“
