Ólafur Hauksson, almannatengill og afi nemanda í Leikskóla Seltjarnaness, kallar verkfallsaðgerðir kennara baunabyssuverkfall og gefur lítið fyrir þá aðferðafræði kennara að vefna til verkfalls í aðeins stöku skóla. Þetta kemur fram í aðsendri grein á Vísir.is.

Ólafur segir að verkfall þurfi að bíta til að hafa áhrif en það geri aðgerðir kennara ekki:

„Kennarar eru hins vegar ekki í alvöru verkfalli sem ætlað er að bíta. Þeir eru í baunabyssuverkfalli sem hefur engin áhrif á viðsemjendur þeirra. Einu áhrifin eru að ergja þá sem verða fyrir baunaskotunum – börn í nokkrum skólum, foreldra þeirra, afa og ömmur, önnur skyldmenni svo og vinnuveitendur foreldranna.

Samninganefnd ríkis og sveitarfélaga missir ekki svefn þó nokkur lítil börn úti í bæ séu svipt skólastarfinu. Því síður samninganefnd kennara. Enda eru samningafundir fáir og ekkert að gerast. Formaður kennara krefst þess að sveitarfélögin og ríkisstjórnin höggvi á hnútinn og láti undan kröfunum. Samt veit hann að ríkisstjórnin hefur ekkert umboð til þess.“

Ólafur segir að verkföllin hafi engu breytt og muni engu breyta. Kennaraforystan þurfi annaðhvort að láta gott heita í bili eða boða til allsherjarverkfalls. Síðan segir hann:

„Það skiptir engu máli í þessari umræðu hvort kennarar eigi skilið betri kjör eða ekki. Lausn á því fæst ekki núna, þegar ríkisstjórnin er varla nema nafnið, kosningar framundan og sveitarfélögin að klára fjárhagsáætlanir. Réttast væri að kennarar tækju sér hlé frá því að reyna að þvinga fram kjarabætur og héldu svo samtalinu áfram eftir kosningar við stjórnvöld sem hafa skýrt umboð og bera ábyrgð.“