Úrskurðarnefnd um upplýsingamál hefur komist að þeirri niðurstöðu að ónefndum einstaklingi skuli veittur aðgangur að upplýsingum um launakjör Harðar Orra Grettissonar framkvæmdastjóra Herjólfs ohf. sem finna má í ráðningarsamningi hans. Er það niðurstaða nefndarinnar að allur almenningur eigi rétt á upplýsingum um launakjör framkvæmdastjóra félagsins og á það væntanlega einnig við um eftirmann Harðar Ólaf Jóhann Borgþórsson sem tekur við starfinu 1. janúar næstkomandi.
Viðkomandi kærði ákvörðun Herjólfs ohf. um að synja beiðni um aðgang að ráðningarsamningum framkvæmdastjóra og útgerðarstjóra til nefndarinnar. Í kærunni var vísað til þess að um væri að ræða tvo æðstu stjórnendur félags sem sé alfarið í eigu Vestmannaeyjabæjar og að bærinn gæfi upp launakjör æðstu embættismanna.
Í umsögn Herjólfs ohf. var vísað til þess að í fyrri málum hafi nefndin staðfest ákvarðanir félagsins um að synja beiðnum um aðgang að ráðningarsamningum starfsmanna.
Í niðurstöðu sinni segir úrskurðarnefnd um upplýsingamál lögaðila sem fellur undir gildissvið upplýsingalaga bera skylda til þess að veita almenningi upplýsingar um launakjör æðstu stjórnenda. Þar sem nefndin hafi áður komist að þeirri niðurstöðu að framkvæmdastjóri Herjólfs teljist til æðstu stjórnenda félagsins þá sé ljóst að almenningur eigi rétt á upplýsingum um launakjör hans.
Nefndin komst hins vegar að þeirri niðurstöðu að kærandinn ætti ekki rétt á upplýsingum um kjör útgerðarstjóra Herjólfs þar sem hann teldist ekki til eins af æðstu stjórnendum félagsins. Var þá vísað til þess að í skýrslu félagsins um framkvæmd starfskjarastefnu kæmu fram upplýsingar um starfskjör framkvæmdastjóra og stjórnar og að félagið hafi ekki skilgreint hverjir teljist til annarra æðstu stjórnenda.
Það er niðurstaða nefndarinnar að kærandinn eigi ekki rétt á aðgangi að ráðningarsamningi Harðar í heild sinni. Var þá vísað til ákvæða upplýsingalaga um að almenningur eigi ekki rétt á gögnum um starfssamband einstakra starfsmanna við opinberan aðila sem viðkomandi starfar hjá.
Herjólfur ohf. skal hins vegar veita aðgang að þeim ákvæðum ráðningarsamningsins þar sem koma fram upplýsingar um launakjör framkvæmdastjórans.
