Héraðssaksóknari hefur ákært mann á Suðurlandi fyrir kynferðislega áreitni vegna atviks sem átti sér stað fyrir rúmlega tveimur árum.
Maðurinn er sakaður um að hafa aðfaranótt sunnudagsins 14. ágúst árið 2022, á salerni skemmtistaðar, haldið annarri hendi konu fastri upp við vegg salernisins, káfað á brjóstum hennar utan klæða, kysst háls hennar og sleikt hægra eyra, og farið með hendi sína inn undir kjól hennar og niður fyrir buxnastreng sokkabuxna sem hún var klædd.
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Fyrir hönd konunnar er krafist tveggja milljóna króna í miskabætur.
Málið var þingfest fyrir Héraðsdómi Suðurlands á Selfossi í dag, 3. október.
