Að sögn Elínar Agnesar Kristínardóttur, aðstoðaryfirlögregluþjóns hjá rannsóknarsviði lögreglunnar á höfuðborgarsvæðinu, átti andlát konu á sjötugsaldri, sem lögreglan tilkynnti um fyrr í morgun, sér stað í austurborginni. Elín vill ekki tilgreina nánar staðsetningu.

Lögregla verst allra frétta í málinu umfram tilkynningu hennar sem var eftirfarandi:

„Lögreglan á höfuðborgarsvæðinu er með til rannsóknar andlát konu á sjötugsaldri.

Tilkynnt var um málið um miðnættið í gær og í kjölfarið var einn handtekinn í tengslum við það.

Rannsókn málsins er á frumstigi og ekki verða veittar frekari upplýsingar að svo stöddu.“

Elín vildi ekki svara því til hvort hinn handtekni hefði tilkynnt um lát konunnar né hvort ljóst sé að andlát konunnar væri talið hafa borið að með saknæmum hætti. Þar sem rannsókn er á frumstigi getur lögregla veitt mjög takmarkaðar upplýsingar um málið.

Hins vegar segir Elín að búast megi við frekari upplýsingum síðar í dag og annarri tilkynningu frá lögreglu um málið.

Ef um morð var að ræða í þessu tilviki, sem tilkynning lögreglu bendir til, þá er þetta áttunda morðið sem er framið á árinu. Það síðasta var 15. september, en Sigurður Fannar Þórsson er grunaður um að hafa orðið dóttur sinni, Kolfinnu Eldeyju, að bana nálægt Krýsuvík.

Þrjú börn hafa verið myrt á árinu, meðal annars sex ára drengur, í íbúðarhúsi við Nýbýlaveg, í lok janúar. Dómur yfir móður hans, sem var ákærð í málinu, fellur næstu daga.

Morðin sjö eru í samtals sex málum en hjónum var ráðinn bani á Neskaupstað seint í ágústmánuði.