Íris Róbertsdóttir, bæjarstjóri í Vestmannaeyjum, ætlar ekki að gefa kost á sér til þingmennsku í komandi kosningum. Hún ætlar að einbeita sér að Vestmannaeyjum.
Þetta kemur fram í færslu hjá Írisi nú síðdegis. Íris hafði verið orðuð við framboð fyrir bæði Samfylkinguna og Viðreisn. Hún var áður í Sjálfstæðisflokknum en situr sem bæjarstjóri fyrir bæjarmálafélagið Fyrir Heimaey.
„Það hefur talsvert verið skrafað um það á opinberum vettvangi síðustu vikurnar hvort að ég sé á leið inn í landsmálin og það hefur færst í aukana nú þegar ljóst er að Alþingiskosningar standa fyrir dyrum,“ segir Íris í færslunni.
Segist hún þakklát fyrir traust þeirra sem hafa leitað til hennar undanfarið.
„Ég hef velt þessu alvarlega fyrir mér, ekki síst í ljósi þess að mér hefur þótt mikið vanta uppá að þingmenn hafi sinnt okkur hér í Eyjum og raunar vantað mikið uppá samtal ríkisins við sveitastjórnarstigið í heild sinni,“ segir Íris. „Hlutir gerst of hægt. Menntamálin eru mér líka mjög hugleikin og þar þarf að stíga ný skref til að tryggja börnum tækifæri til framtíðar. Raunar erum við þegar komin af stað í þá vegferð hér í Eyjum m.a. með verkefninu Kveikjum neistann. n að þessu sögðu þá er niðurstaða mín sú að kraftar mínir munu nýtast betur við þau verkefni sem ég hef sinnt í Eyjum og hef því ákveðið að gefa ekki kost á mér í landsmálin í þetta skiptið. Ég hlakka til að vinna áfram að hagsmunum okkar hér í Eyjum sem bæjarstjóri.“
