Jón Trausti Reynisson, fyrrverandi ritstjóri DV og Stundarinnar og núverandi blaðamaður og framkvæmdastjóri Heimildarinnar, greindi stöðuna á Facebook-síðu sinni í gærkvöldi.
„Á endanum mun fólk kannski sjá það þannig að Katrín kom Bjarna Ben aftur í ríkisstjórn, Guðmundur Ingi gerði hann að forsætisráðherra og Svandís hrakti hann burt,“ sagði Jón Trausti og bætti við:
„Það, í kaldhæðni örlaganna, bjargaði honum frá því að vera hafnað af eigin flokki á landsfundi fyrir kosningar, eftirlét honum frumkvæðið á ný og aflaði honum hámarksathygli á kosningafund í beinni sem sterka leiðtoganum, þó með lágmarksárangur sem slíkur.“
Jón Trausti setti svo spurningarmerki við úthald Samfylkingarinnar sem hefur verið á mikilli siglingu í skoðanakönnunum að undanförnu. Ef fer sem horfir verður Samfylkingin langstærsti flokkurinn að loknum næstu kosningum.
„Frekar ólíklegt er að Samfylkingin með breiðari en þynnra smurða stefnu haldi rúmlega fjórðungsfylgi út á ferskleika og óánægju, nema Kristrúnu takist að staðfesta sig sem nýja miðju og stöðugleika stjórnmálanna, eins og Katrínu tókst þó með meiri reynslu. Samfylking hefði geta unnið með Sjálfstæðisflokki undir nýjum formanni. En núna er það þannig að Sjálfstæðisflokkur, Miðflokkur og Viðreisn eru í síðustu könnun einni TikTok herferð frá því að ná meirihluta með tæra hægri stjórn, ef einhver skyldi vilja vinna með Bjarna og Sigmundi, þó ekki sé nema þeir sjálfir.“
