Breskur áhrifavaldur á þrítugsaldri hrapaði til bana af brú á Spáni. Talið er að hann hafi ætlað að taka myndefni fyrir samfélagsmiðla.
Greint er frá því í spænskum og breskum miðlum að 26 ára breskur karlmaður hafi hrapað af brúnni Castilla-La Mancha í bænum Talavera de la Reina suðvestan við Madríd, höfuðborg Spánar um klukkan 7:15 á sunnudagsmorgun. Með honum á brúnni var samlandi hans, 24 ára gamall.
Þetta kemur fram í tilkynningu frá sveitarfélaginu.
Brúin er 192 metrar á hæð þar sem hún er hæst og 730 metrar að lengd. Turninn er strengdur með 152 vírum. Þetta er hæsta brúin á Spáni.
Eins og gefur að skilja er klifur á brúnni stranglega bannað. „Undir engum kringumstæðum má klifra upp brúnna,“ sagði Macarena Munoz, sveitarstjórnarfulltrúi þegar hann tilkynnti um andlátið. „Hann var 26 ára Englendingur sem féll þegar hann var að klifra upp brúnna, sem er eitthvað sem sveitarstjórn hefur komið á framfæri að er ekki leyfilegt eins og við höfum margítrekað.“
Að sögn sveitarstjórnar höfðu Bretarnir tveir komið til Tavalera de la Reina í þeim tilgangi að klifra upp brúnna og taka upp myndefni fyrir samfélagsmiðla. Hvorugur mannanna voru með nein reipi eða ólar til að festa sig við brúnna né nokkurn annan öryggisbúnað.
Í blaðinu The Mirror segir að hinn yngri hafi verið stjarfur eftir að félagi hans hrapaði til dauða. Það var ökumaður bíls sem keyrði eftir brúnni sem hringdi á viðbragðsaðila. Hinn yngri Breti kom ekki upp orði.
Dómari hefur heimilað að lík mannsins verði flutt á útfararstofu. Hinn yngri Breti var yfirheyrður á lögreglustöð en hefur nú verið sleppt.
