Hæstiréttur hefur synjað dæmdum barnaníðingi um að taka fyrir dóm sem féll í Landsrétti í júní. Maðurinn var dæmdur fyrir sifjapell og nauðgun gegn 15 ára dóttur sinni. Meðal annars að hafa við hana margsinnis endaþarmsmök.
Maðurinn, sem er um fertugt, var dæmdur í Héraðsdómi Reykjaness þann 19. september á síðasta ári. Hlaut hann átta ára dóm fyrir brot gegn barninu sem voru framin á um hálfs árs tímabili, frá miðju ári 2022 fram til upphaf árs 2023.
Auk þess að hafa við hana endaþarmsmök, neyddi hann hana til þess að hafa við sig munnmök, sleikti kynfæri hennar, fór með fingur inn í kynfæri hennar og káfaði á brjóstum eins og segir í dóminum. Þá hafi hann tekið ljósmyndir og myndbandsupptökur. „Ákærði nýtti sér freklega yfirburði sína sem faðir og að barnið var eitt með honum fjarri öðrum,“ segir í dóminum. Brotin áttu sér meðal annars stað í Bandaríkjunum.
Í dómi héraðsdóms segir að fundist hafi 27 ljósmyndir og 9 myndskeið af brotunum. Í fartölvu hafi einnig fundist hátt í 40 þúsund ljósmyndir og 600 kvikmyndir sem sýni börn á kynferðislegan hátt.
Sjá einnig: Átta ára fangelsi fyrir gróft kynferðisofbeldi gegn dóttur sinni – Tók myndbönd af brotunum
Í Landsrétti var fallið frá þeim hluta málsins er varðaði ljósmyndir og myndskeið af brotum hans gegn dótturinni. Í dóminum sagði að ósamræmis gætti í ákærunni og óskýrleikinn hefði torveldaði manninum að taka afstöðu til sakarefnisins. 8 ára fangelsisdómur 6 milljón króna bætur til dótturinnar voru hins vegar óhaggaðar frá Héraðsdómi til Landsréttar.
Í leyfisbeiðni sinni taldi hinn dæmdi barnaníðingur að refsingin hefði verið of hörð, taldi hann dóm Landsréttar rangan og krafðist sýknu. Sagðist hann hafa verið sakfelldur án viðhlítandi sönnunargagna.
Eins og áður segir hafnaði Hæstiréttur beiðninni. Taldi rétturinn ekkert í málinu hafa almenna þýðingu eða að mjög mikilvægt væri af öðrum ástæðum að fá úrlausn Hæstaréttar um.
