Yfir 800 undirskriftir hafa safnast gegn fyrirhugaðri þéttingu byggðar í tveimur götum í Grafarvogi. Íbúarnir í götunum hvetja íbúa í fleiri hverfum til þess að setja af stað sams konar undirskriftalista.

Í sumar var greint frá því að Reykjavíkurborg hygðist láta reisa um 500 nýjar íbúðir í Grafarvogi, það er þétta byggðina. Þetta er átaksverkefni sem hrint var úr vör samhliða því að Einar Þorsteinsson tók við sem borgarstjóri.

Sagði Einar að það þyrfti að byggja fjölbreytt húsnæði í úthverfunum, ekki aðeins fjölbýli. Áformin voru hins vegar ekki kynnt í íbúaráði áður en þau voru kynnt almenningi. Sú kynning var ekki áætluð fyrr en eftir sumarfríin.

Muni auka álag á skóla og auka mengun

Þegar þetta er skrifað hafa 831 skrifað undir undirskriftalista gegn fyrirhugaðri þéttingu byggðar í Smárarima og Sóleyjarrima. Áætlað er að byggja stórt fjölbýlishús með 65 til 96 íbúðum á einni lóðinni þar.

„Margir íbúar hafa miklar áhyggjur af þessu, þar sem það mun skerða mikilvægt útivistarsvæði sem er mikið notað af íbúum,“ segir í færslunni sem fylgir undirskriftalistanum. En á hann er safnað á síðunni island.is.

Segja íbúarnir að við bót nærri 100 íbúða geti einnig ofhlaðið skóla og leikskóla á svæðinu. Skóla sem séu nú þegar fullnýttir. Þá muni þéttingin einnig auka umferð í hverfinu og skapa meiri mengun, það er skapa hættu fyrir börnin úti á götu og hafa áhrif á loftgæði.

Sjá einnig:

„Það er þjóðhagslega gríðarlega mikilvægt að við byggjum upp íbúðarhúsnæði fyrir Íslendinga“

„Fjölbýlishús í nokkrum hæðum samræmast ekki núverandi einbýlishúsum og raðhúsum, og myndu breyta ásýnd hverfisins,“ segir í færslunni. „Íbúar keyptu eignir sínar með ákveðnar forsendur í huga, eins og græn svæði, hreint loft, minni umferð og öryggi, og þessi bygging rýrir þær forsendur og lífsgæði íbúanna.“

Undirskriftalistann má finna hér.

Íbúasamtök boða fund á mánudag

Þá hafa Íbúasamtök Grafarvogs skipulagt fund í bókasafninu í Spönginni klukkan 17:00 á mánudag vegna fyrirhugaðra þéttingaráforma.

Í tilkynningu samtakanna á samfélagsmiðlum segir að fulltrúar þeirra hafi verulegar áhyggjur af áformunum og vilji þétta raðirnar til þess að berjast gegn þeim.

„Aldrei í sögu hverfisins hefur verið herjað með þeim hætti sem nú er ráðgert. Því þurfum við að stilla saman strengi,“ segir Elísabet Gísladóttir, fulltrúi í samtökunum.

Að hennar sögn verður fundurinn óformlegur og hugsaður til þess að fólk geti komið skoðunum sínum á framfæri. Einnig verður lagt á ráðin um næstu skref. Allir sem hafa skoðun á málinu eru velkomnir á fundinn.