Eins og DV og fleiri fjölmiðlar greindu frá í morgun hefur verið lokað fyrir aðgang Samgöngustofu að sjúkraskrám eftir að Persónuvernd komst að þeirri niðurstöðu að slíkt væri í trássi við lög sem og vinnsla fyrrnefndu stofnunarinnar á upplýsingum úr sjúkraskrám. Í tilkynningu frá Samgöngustofu segir að aðgangurinn hafi verið og sé nauðsynlegur til að gæta að flugöryggi og aðeins trúnaðarlæknir hafi hingað til haft þennan aðgang.

Viðkvæmar upplýsingar úr sjúkraskrá afhentar ólöglega

Í tilkynningunni segir að í ljósi nýlegrar umfjöllunar fjölmiðla um aðgang Samgöngustofu að sjúkraskrám, vilji stofnunin koma eftirfarandi upplýsingum á framfæri:

„Aðeins yfirlæknir flugsviðs Samgöngustofu hefur aðgang að sjúkraskrám og engir aðrir starfsmenn stofnunarinnar hafa haft eða hafa slíkan aðgang. Yfirlæknir flugsviðs Samgöngustofu vinnur eftir ströngum verklagsreglum og tilgangur skoðana í sjúkraskrá er að leggja mat á heilsufarsgögn umsækjanda um heilbrigðisvottorð fyrir flugliða og flugumferðarstjóra sem og læknaskýrslur fyrir öryggis- og þjónustuliða. Mikilvægt er að yfirlæknir hafi nauðsynleg gögn til þess að leggja mat á heilbrigði umsækjanda um heilbrigðisvottorð, um er að ræða mikilvægt flugöryggismál og mjög strangar kröfur gilda um heilbrigði flugliða, flugumferðarstjóra og þjónustu- og öryggisliða.“