Mikla athygli vöktu fréttir fjölmila í gær af framferði læknis sem ávísaði ávanabindandi lyfjum á konu í tíu ár eftir andlát hennar. Læknirinn var um síðir sviptur starfsleyfi eftir að í ljós kom að hann hafði gefið út fjölmargar lyfjaávísanir fyrir ávana- og fíknilyf í miklu magni til konunnar allt frá andláti hennar árið 2014 og fram í febrúar 2023. Á þessum tíma hafði læknirinn breytt lyfjameðferð, bætt við lyfjum og aukið skammta ávana- og fíknilyfja til konunnar. Voru allar ávísanir læknisins til konunnar eftir andlát hennar leystar út á grundvelli umboðs til handa sambýlismanns hennar, sem einnig var sjúklingur hjá lækninum yfir langt skeið og fékk sömuleiðis ávísað lyfjum fyrir miklu magni af ávana- og fíknilyfjum.
Læknirinn skýrði lyfjaávísanirnar til látnu konunnar með þeim hætti að hann hefði ekki haft vitneskju um að konan væri látin fyrr en honum bárust þær upplýsingar frá lögreglu árið 2023. Konan hafi verið skjólstæðingur hans frá árinu 1997 en komið síðast til hans í mars 2014. Eftir það hafi sambýlismaður hennar komið reglulega með umboð frá konunni og upplýst lækninn um heilsufar hennar og ástand. Hann hafi sagt að konan héldi til í Úkraínu, heimalandi hennar, þar sem hún byggi hjá bróður sínum. Hún kæmi reglulega til Íslands en treysti sér ekki til læknisins þegar hún væri á landinu.
Gigtarlæknirinn Ragnar Freyr Ingvarsson er hugsi yfir málinu en hann tjáir sig um það á Facebook-síðu sinni. Hann spyr sig hvort eftirlitskerfin okkar séu í lagi:
„Ég hef ekki í hyggju að verja starfshætti þessa læknis.
Þetta vakti mig þó til umhugsunar um hvort engum bjöllum hafi hringt í kerfinu okkar þegar lyfjum var endurtekið ávísað og voru endurtekið afgreidd til sjúklings sem var látin – í næstum heilan áratug.
Og fékk umsókn um örorku og þá umsókn samþykkta og peninga greidda. Já, og reikningar samþykktir af hendi Sjúkratrygginga Íslands – í næstum heilan áratug.
Eru eftirlitskerfin okkar í lagi?“
