Kjartan Magnússon, borgarfulltrúi Sjálfstæðisflokksins, lagði fram tillögu í umhverfis- og skipulagsráði Reykjavíkur í október í fyrra þar sem meðal annars var lagt til að öryggi gangandi vegfarenda yfir Sæbraut yrði aukið. Tillagan var hins vegar felld.

Morgunblaðið fjallar um þetta í dag.

„Það er nátt­úr­lega hræðilegt til­efni að þurfa að ræða þetta þegar orðið hef­ur bana­slys en það er rétt að þetta er ekki nýtt mál og þetta hef­ur verið rætt í að minnsta kosti nokk­ur ár,“ seg­ir Kjart­an í samtali við Morgunblaðið.

Kona á fertugsaldri lést þegar fólksbíl var ekið á hana þegar hún var á leið yfir Sæbraut, á milli Súðarvogs og Kleppsmýrarvegar, aðfaranótt sunnudags.

Í Morgunblaðinu segir að eftir að tillagan var felld hafi borgarfulltrúar Sjálfstæðisflokksins lagt fram bókun þar sem þeir sögðu ófremdarástand ríkja á gatnamótum Sæbrautar og Kleppsmýrarvegar. Önnuðu þau engan veginn þeim umferðarþunga sem kemur frá atvinnuhverfinu sunnan Sæbrautar né ört vaxandi íbúðabyggð þar.

Til stendur að leggja fram nýja tillögu á fundi borgarstjórnar í dag þess efnis að ráðist verði í neyðaraðgerðir til að bæta umferðaröryggi á fyrrnefndum gatnamótum. Hefur Morgunblaðið eftir Kjartani að það sé hræðilegt að upp þurfi að koma banaslys svo umræðan fari aftur af stað. Kveðst hann vona að betur verði tekið í tillögu flokksins í dag.