Fyrsta áskorunin um forsetaframboð er komin fram, virtur hæstaréttarlögmaður, Sævar Þór Jónsson hjá Lögmannstofunni Sævar Þór & Partners, og rithöfundur (Barnið í garðinum 2021) telur Lilju vera fýsilegan kost í embættið.

Guðni Jóhannesson, forseti Íslands, tilkynnti í nýársávarpi sínu í dag að hann hyggðist ekki bjóða sig fram til endurkjörs í forsetakosningum sem haldnar verða næsta sumar. Guðni var kjörinn forseti árið 2016 og var endurkjörinn árið 2020.

Lilja Alfreðsdóttir er menningar- og viðskiptaráðherra og varaformaður Framsóknarflokksins. Í heildina hefur hún ekki verið umdeild í ráðherraembættum sínum en hún var utanríkisráðherra 2016 til 2017, mennta- og menningarmálaráðherra 2017-2021, viðskipta- og menningarmálaráðherra 2021-2022 og menningar- og viðskiptaráðherra síðan 2022.

Sævar Þór ritar eftirfarandi færslu um málið á Facebook:

„Guðni hefur staðið sig vel í þessu embætti og er samkvæmur sjálfum sér þar sem hann ætlaði sér aldrei að vera of lengi í því. Það er missir af honum en að mínu mati er kominn tími á að fá aftur konu á Bessastaði. Eflaust eiga margir eftir að máta sig við starfið en að mínum mati væri ekki slæmt að fá hana Lilju Alfreðsdóttur í þetta embætti.“