Móðir Ibrahims, Robina Uz-Zaman, var í viðtali í Kastljósi í gærkvöldi þar sem fjallað var um málið. Rannsókn slyssins lauk í janúar síðastliðnum og er bílstjóri steypubílsins með réttarstöðu sakbornings. Málið er enn hjá ákærusviði og hefur fjölskyldan ekki heyrt neitt.
Slysið varð þann 30. október 2023 við bílastæði á milli íþróttamiðstöðvar Hauka og Ásvallalaugar og var steypubíllinn að aka á miðju bílaplaninu þegar hann ók á Ibrahim með þeim afleiðingum að hann lést. Engin vitni urðu að slysinu.
Í umfjölluninni í gær var bent á að gerðar hafi verið úrbætur eftir slysið þar sem girðingar voru settar upp og lokað fyrir almenna umferð við vinnusvæðið. Gagnrýnir Robina að aðeins sé brugðist við eftir að slysin gerast.
Steypubíllinn hafi ekki átt að vera að keyra á þessum stað á þessum tíma dags og í ljós hafi komið að búnaður hans hafi ekki virkað sem skyldi. Bæjaryfirvöld, verktakinn, bílstjórinn og fyrirtækið sem átti bílinn beri ábyrgð á aðstæðunum þegar Ibrahim lést.
Kom fram í Kastljósi að fjölskyldan vilji fá svör og að einhver axli ábyrgð og þess vegna sé mikilvægt að vekja athygli á málinu. Segir Robina að hún íhugi að fara í skaðabótamál við alla hlutaðeigandi.
Eðli málsins samkvæmt var andlát Ibrahims mikið áfall fyrir fjölskylduna og segir Robina að það hafi tekið hana langan tíma að safna styrk til að átta sig á hvað hún þyrfti að gera.
„Mér finnst mikilvægt að við sem samfélag hugsum hvað við erum að gera og hvernig við gerum hlutina. Sérstaklega í sambandi við byggingarframkvæmdir. Gríðarlegar miklar byggingarframkvæmdir eru mjög víða en það er ekki fylgst með öryggisráðstöfununum.“
