Arnar Þór Jónsson, lögmaður og forsetaframbjóðandi, hyggst ganga til liðs við stjórnmálaflokk í næstu viku. Arnar Þór hafði áður sagst ætla að stofna eigin stjórnmálaflokk.
Arnar Þór, sem er fyrrverandi varaþingmaður Sjálfstæðisflokksins, greindi frá þessu í þættinum Vikulokunum á Rás 1.
Í viðtalinu sagði hann mikilvægt að verjast bókun 35 frá Evrópusambandinu. Einnig að flestir flokkar væru orðnir eins, sósíaldemókratískir.
„Þess vegna hugsa ég með mér að kannski er ekki tími til þess eins og staðan er núna að fara að verja tíma í að stofna nýjan stjórnmálaflokk, þó það sé mjög mikil þörf á því, borgaralegan klassískan íhaldsflokk og hægra megin við miðju, því það vantar slíkan flokk á Íslandi,“ sagði hann í viðtalinu og skaut föstum skotum á sinn gamla flokk, Sjálfstæðisflokkinn.
Arnar Þór, sem fékk 5 prósent í forsetakosningunum í júní hefur verið sterklega orðaður við framboð fyrir Miðflokkinn. Miðað við hversu mikið fylgi flokkurinn er að mælast í skoðanakönnunum má gera ráð fyrir að hann bæti við sig mörgum þingsætum í næstu kosningum, sem verða í síðasta lagi eftir rúmt ár.
