Systir Sigurðar Fannars Þórssonar, sem situr í gæsluvarðhaldi, grunaður um að hafa orðið tíu ára dóttur sinni að bana á sunnudagskvöld, gagnrýnir hvernig fjölskyldu stúlkunnar í föðurlegg var tilkynnt um andlát hennar og málsatvik.
Lögregla greindi frá nafni stúlkunnar með tilkynningu fyrr í dag. Hún hét Kolfinna Eldey Sigurðardóttir, tíu ára gömul, búsett í Reykjavík. Faðir hennar, Sigurður Fannar Þórsson, var úrskurðaður í gæsluvarðhald í gær til 24. september og er hann grunaður um að hafa orðið dóttur sinni að bana.
Hulda Margrét Þorláksdóttir, er eldri hálfsystir Sigurðar móðurmegin. Fjölskyldan er, eðli málsins samkvæmt, í áfalli eftir tíðindin en í viðtali við Vísi gagnrýndi Hulda Margrét hvernig fjölskyldu Sigurðar var tilkynnt um andlát dóttur hans, handtöku hans og málsatvik.
Að sögn Huldu Margrétar mætti lögreglan heim til móður stúlkunnar á sunnudagskvöld til að tilkynna henni að að dóttir hennar hefði verið myrt og barnsfaðir hennar handtekinn.
Segir hún að móðir Kolfinnu Eldeyjar hafi beðið lögregluna um að tilkynna föðurfjölskyldu stúlkunnar um atburðinn. Það hafi hins vegar ekki verið gert og því hafi móðir Sigurðar Fannars og systkini hans ekki vitað neitt. Hulda segist sjálf hafa verið spurð að því úti á götu í hádeginu á mánudag hvort fréttirnar úr Krýsuvík væru af bróður hennar og dóttur hans.
Hulda segir að feðginin hafi átt í góðum samskiptum og að Kolfinna Eldey hafi verið augasteinn föður síns. Fjölskyldan eigi því erfitt með að ímynda sér að Sigurður Fannar beri ábyrgð á ódæðinu. – „Hann myndi aldrei skaða dóttur sína,“ segir Hulda Margrét í stuttu samtali við DV.
Stórfjölskyldan eigi nú um sárt að binda og mörg lítil börn syrgi frænku sína sem þau þekktu vel.
