Maðurinn sem er í haldi lögreglu grunaður um að hafa orðið ungri stúlku að bana er faðir hennar. Þetta herma heimildir DV og hafa Vísir og Nútíminn greint frá því sama.
Tilkynnt var um málið um kvöldmatarleytið í gær og var einn maður handtekinn á Krýsuvíkursvæðinu vegna málsins. Brotaþoli fannst þar einnig. Maðurinn er sjálfur sagður hafa hringt á lögreglu og tilkynnt um málið. Stúlkan sem um ræðir var á grunnskólaaldri.
DV reyndi að ná tali af Grími Grímssyni, yfirlögregluþjóni á rannsóknarsviði lögreglunnar, nú rétt fyrir hádegi, en ekki náðist í hann. Liggur ekki fyrir hvort og þá hvenær farið verður fram á gæsluvarðhald yfir manninum.
