Íslensk kona er á meðal fimm sakborninga í stóru fíkniefnamáli í Færeyjum. Lögregla haldlagði seglskútu sem lagðist að við smábátahöfnina í Vágsbotn, í fyrradag, og handtók fimm manneskjur.
Portal greinir frá.
Um borð í skútunni fundust 3,8 kg af amfetamíni og 23 kg af kannabisefnum. Þrír karlar og tvær konur eru ákærð í málinu. Önnur konan er íslensk en hin er dönsk. Tveir karlanna eru danskir en sá þriðji er Færeyingur.
Fólkinu var birt kæra í gær en þinghaldi var síðan lokað eftir að kæran hafði verið lesin upp. Öll fimm neita sök í málinu.
Söluverðmæti fíkniefnanna er samkvæmt frétt Portal talið vera um 10 milljónir danskra króna sem jafngildir rúmlega 200 milljónum íslenskra króna.
Fréttinni hefur verið breytt. Tekið skal fram að fólkið hefur verið kært en ekki ákært, enda rannsókn málsins ekki lokið.
