Helgi Magnús Gunnarsson vararíkissaksóknari segist viss um það að Guðrún Hafsteinsdóttir dómsmálaráðherra hafni beiðni Sigríðar J. Friðjónsdóttur ríkissaksóknara um að hann verði leystur tímabundið frá störfum vegna kæru samtakanna Solaris.

Helgi segir þetta í nýjasta þætti Dagmála á mbl.is sem fjallað er um í Morgunblaðinu í dag.

Þekktir Íslendingar hafa skrifað undir stuðningsyfirlýsingu við vararíkissaksóknara

„Ég hef fulla trú á því að Guðrún Haf­steins­dótt­ir hafni þessu bara, sendi þetta til föður­hús­anna,“ segir hann í þættinum og kveðst vilja mæta til vinnu til að vinna fyrir kaupinu sínu sem skattgreiðendur borga honum.

„Ef það er eitt­hvert vanda­mál fyr­ir aðra – það er ekki vanda­mál fyr­ir Guðrúnu Haf­steins­dótt­ur, hún hef­ur hálfa þjóðina á bak við sig í því – ef það er vanda­mál fyr­ir Sig­ríði þá verður hún bara að eiga við það. Það er henn­ar sam­visku­spurn­ing hvað hún vill gera,“ segir hann í þættinum.

Helgi segist ætla alla leið með málið ef allt fer á versta veg. Það séu hreinar línur.

„Ég ætla ekk­ert að bakka út úr því. Ég ætla að standa með sjálf­um mér í því og ég ætla að standa keik­ur á meðan stætt er. Og ég mun fara alla leið með þetta og gef ekk­ert eft­ir.“

Nýjasta þátt Dagmála á mbl.is má nálgast hér.