Þann 3. september næstkomandi verður þingfest fyrir Héraðsdómi Reykjaness mál gegn manni sem Héraðssaksóknari hefur ákært fyrir sérstaklega hættulega líkamsárás, húsbrot og eignaspjöll.
Maðurinn er sagður hafa valdið spjöllum á bíl brotaþola með því að slá slökkvitæki nokkrum sinnum í framrúðu bílsins þannig að rúðan brotnaði. Hann hafi síðan farið heimildarlaust inn á heimili brotaþola og ráðist að honum og stungið hann tvisvar með hnífi vinstra megin í brjóstkassa. Áverkum af hnífstungunum og átökum mannanna í kjölfarið er lýst með eftirfarandi hætti í ákæru:
„…Y hlaut punktsár ofarlega á brjóstkassa niður undan holhönd í hæð við geirvörtu, örlítið punktsár neðarlega á brjóstkassa ásamt 3 sm línulaga mari eða hrufli, væg eymsli innanvert á neðri vör, örlítið hruflsár og væg eymsli á vinstri olnboga, eymsli og væga bólgu í kringum hægri þumalrót og fram á þumalinn og væg eymsli neðan við vinstri hnéskel.“
Héraðssaksóknari krefst þess að ákærði verði dæmdur til refsingar og greiðslu alls sakarkostnaðar.
Fyrir hönd brotaþola er gerð krafa um skaða- og miskabætur upp á fjórar milljónir króna.
Þess má geta að málið virðist hafa dregist lengi í kerfinu en hin meintu brot voru framin þann 13. mars 2022.
