Úkraínumenn fullyrða að þeir hafi sökkt kafbátnum Rostov on Don sem lá í höfn við Sevastopol á Krímskaga. Ef fregnirnar reynast réttar er um mikið áfall fyrir Rússa að ræða sem hafa, samkvæmt fullyrðingum Úkraínumanna, misst um þriðjung Svartahafsflota síns síðan stríðsátökin byrjuðu fyrir meira en tveimur árum.

Kafbáturinn, sem byggður var árið 2014 og tekur 52 manna áhöfn, hefur verið mikilvægur liður í hernaði Rússa og hefur Vladimir Pútín dásamað gripinn í gegnum tíðina. Úr honum hefur verið mögulegt að skjóta langdregnum  Kalibr-eldflaugum á mikilvæg skotmörk og því hafa Úkraínumenn lagt mikla áherslu á að reyna að gera hann óvirkan.

Kafbáturinn skemmdist í eldflaugaárás í september 2023 en var þá færður til hafnar og lagfærður með ærnum tilkostnaði. Rússar höfðu nýverið tekið hann aftur í gagnið og því er um talsvert áfall að ræða fyrir þá.