Vivian Jenna Wilson, dóttir auðkýfingsins Elon Musk, hefur borið til baka ummæli hans í nýlegu viðtali. Sagði hún faðir sinn hafa logið um ýmislegt í æsku hennar.
Elon sagðist hafa verið narraður til að veita samþykki fyrir kynleiðréttingunni á Vivian, sem hét þá Xavier. Sagði Musk að mikil ringulreið hefði verið vegna covid og honum hafi verið tjáð að Xavier væri í sjálfsvígshættu. „Ég missti son minn í raun,“ sagði Musk í viðtalinu við Daily Wire. Sagði hann að Xavier hefði verið samkynhneigður og einhverfur. „Hann valdi jakka handa mér og sagði mér að ég væri fabjúlöss.“
Var Musk harðorður í garð þeirra sem væru að „bera út boðskapinn“ um kynleiðréttingar og sagðist vilja þau í fangelsi. Hafa ummæli Musk fallið í mjög grýttan jarðveg.
„Ég valdi aldrei neina jakka fyrir hann og ég var svo sannarlega ekki að kalla hann fabjúlöss. Ég notaði ekki orðið fabjúlöss þegar ég var fjögurra ára af því að ég var fjögurra ára,“ sagði Wilson sem er tvítug í dag og hefur átt í erfiðu sambandi við föður sinn undanfarin ár.
Sagði Wilson að Musk hefði verið lítið til staðar þegar hún var að alast upp. Þegar hann hafi verið á staðnum hafi hann stanslaust áreitt sig vegna kven og hinseiginleika hennar.
„Ég er löglega viðurkennd sem kona í Kaliforníufylki og ég skipti mér ekki af þeim sem eru fyrir neðan mig,“ sagði Wilson.
