Íbúar grænlenska þorpsins Ittoqqortoormiit við Scoresby-sund eru í hálfgerðu áfalli tvær ísbjarnaheimsóknir í vikunni. Þorpsbúar eru alvanir ísbjörnum í nærumhverfi sínu en að sögn Arnars Valgeirssonar, hjá Kalak – vinafélagi Íslands og Grænlands, gerist það þó ekki nema einu sinni á ári, að meðaltali, að ísbirnir komi inn í þorpið og þá, er það nær undantekningalaust að vetri til.

„Það þekkist ekki að ísbjörn komi inn í þorpið að sumri til og hvað þá tveir í röð. Fólk er bara í sjokki,“ segir Arnar, sem þekkir vel til í Ittoqqortoormiit. Hann hefur heimsótt þorpið margoft undanfarin ár og var þar síðast um páskana við fjórða mann þar sem börnum í þorpinu var meðal annars kennd skák. Blaðamaður Morgunblaðsins, Veronika Steinunn Magnúsdóttir, var ein leiðangursmanna og skrifaði áhugaverða grein um upplifunina, þar sem áhyggjur þorpsbúa af ísbjörnum voru einmitt tíundaðar.

Arnar á marga vini í þorpinu og hann hefur því fylgst vel með atburðarásinni í Ittoqqortoormiit síðustu daga í gegnum Facebook-síður vina sinna. Fyrst kom ísbjörn inn í þorpið á þriðjudaginn og varð uppi fótur og fit enda var fótboltaleikur barna í gangi milli tveggja liða og því mikið stuð í bænum. Björninn var þegar í stað felldur enda að öllum líkindum í ætisleit og stórhættulegur.

„Svo í gær, miðvikudag, kemur enn stærri björn inn í bæinn og þá varð fólki ekki um sel,“ segir Arnar. Vel var fylgst með ferðum bjarnarins en að endingu var staðan metin þannig að nauðsynlegt væri að fella dýrið.

Grænlenski miðillinn KNR fjallaði um málið og birti myndir og myndskeið af atburðunum.

Eins og áður segir þá eru þorpsbúar, að sögn Arnars, afar áhyggjufullir yfir þróuninni. Líklegt má telja að einhverjar breytingar í umhverfi bjarnanna séu að eiga sér stað fyrst að þeir eru farnir að sækja inn í þorpið að sumri til. Að öllum líkindum er um að ræða afleiðingar af loftslagsbreytingum. Hafa margir áhyggjur af tilvist ísbjarna í slíkum hamförum enda treysta þeir á ísbreiðurnar til að veiða sér til matar.